MASULOB-ON NGA BALITA. Gipabati sa hepe sa Provincial Disaster and Risk Reduction Management Officer Dr. Anthony Damalerio ang subo nga balita nga may duha ka namatay ug kalit nga pagdaghan sa kaso sa COVID sa Bohol, Nob 27, didto sa Dagyawan sa Barangay Camias sa Calape, (rahc/PIA-7/Bohol)

CORTES, Bohol Nov. 29 (PIA) -- Napulo ug unom ka bag-ong kaso, usa niini gi-ingon nga natakdan dinhi sa Bohol, ang natala Nobyembre 28, 2020, segun pa sa taho sa Bohol Inter Agency Task Force on the management of Emerging Infectious Diseases.

Natala usab ang usa pa ka kamatayon tungod sa gikaintapan nga sakit, nga nagdala sa kinatibuk-ang kadaghanon sa mga nangamatay dinhi, ngadto na sa 15.

Hinuon, ang 16 ka bag-ong kaso nga natala sa Sabado, ikatulo lamang kini nga bahin, sa 52 ka bag-ong kaso nga natala niadtong Nobyembre 27, Biyernes, diha nga mitala ang Tagbilaran City og 25 ka bag-ong kaso nga nakadugang sa ilang duha ka sa positibo nga kaso sa Corona virus disease (COVID-19) gikan sa mga nanguli nga locally stranded individuals.

Niadtong adlawa, sa 88 ka kinatibuk-ang aktibo nga kaso sa COVID-19, ang Tagbilaran mitala sa siyam ka bag-ong kaso nga gitumbok nga epekto sa local nga pagtakod.

Sa Tagbilaran gihapon, 16 ka kaso usab ang nakasulod sa syudad kay nadala sa mga locally stranded individuals (LSI), nanguli nga Overseas Filipino Workers (OFW) ug nanulod nga Authorized Persons Outside Residence (APOR).

Niini hinuon, gipasalig sa mga tinugyanan nga dili na kaayo kahadlokan ang mga kaso nga dala sa LSI, OFW ug APOR kay silang tanan nakapahiluna na sa ilang tagsatagsa ka mga quarantine facilities.

Apan, nagkadaku ang kahingawa sa mga Bol-anon sa mga kaso sa local nga pagpanakod sanglit mahimo nga kini sila nagsige na og pangpakanit sa kagaw nga nagdala sa sakit sa wala pa sila mahibaw-i nga nagpositibo na.

Niadtong Biyernes, Nobyembre 27, aduna nay 25 ka mga kaso sa lokal nga pagtakod samtang pagka Sabado, lain nga usa pa ang nadugang sa talaan sa local transmission.

Sa sama gihapon nga adlaw, 37 ka bag-ong kaso ang nadala sa nanguli sa syudad ug mga kalungsuran sa Bohol samtang naglaum nga makasaulog sa Pasko uban sa ilang mga banay.

Sa pagka Sabado, lain nga 15 na usab ka kaso ang napuno nga dala sa mga nanguli.

Sa Sabado usab nataho ang dugang nga kinabuhi nga nakalas sa sakit ug kini usa ka taga Garcia Hernandez, nga nagtumod sa mga pagkamatay sa Bohol tungod sa COVID ngadto na sa 15.

Dungan usab niini, subli nga gihangyo ni Bise mayor Junnie Yu sa Calape atul sa usa ka pagtapok sa mga katawhan didto sa bukirang barangay sa Calape, sa pagsanong gyud permi sa social distancing ug sa pagsul-ob og mask sa bisan asa nga lugar kon makagawas sa balay.

Mituo ang Bise Mayor, kinsa usa ka mananambal, nga bisan sa pag-amping na lang sa mga protocols, may daku na kini nga ikatabang sa pagpapugong sa pagkatag sa pagpanakodtakod. (rahc/PIA-7/Bohol)